Matayo 24
2 Naye n'addamu n'abagamba nti Temulaba bino byonna? mazima mbagamba nti Tewalisigala wano jjinja eriri kungulu ku jjinja eritalisuulibwa wansi.
3 Bwe yali atudde ku lusozi olwa Zeyituuni, abayigirizwa ne bajja gy'ali kyama, ne bagamba nti Tubuulire bino we biribeererawo n'akabonero ak'okujja kwo bwe kaliba, n'ak'emirembe gino okuggwaawo?
4 Yesu n'addamu n'abagamba nti Mulabe omuntu yenna tabakyamyanga.
5 Kubanga bangi abalijja mu linnya lyange, nga bagamba nti Nze Kristo; balikyamya bangi.
6 Muliwulira entalo n'ettutumu ly'entalo: mulabe temweraliikiriranga: kubanga tebirirema kubaawo; naye enkomerero ng'ekyali.
7 Kubanga eggwanga liritabaala eggwanga ne kabaka alitabaala kabaka: walibaawo enjala n'ebikankano mu bifo ebitali bimu.
8 Naye ebyo byonna lwe lubereberye lw'okulumwa.
9 Lwe balibawaayo mmwe mubonyebonyezebwe, balibatta: nammwe mulikyayibwa amawanga gonna okubalanga erinnya lyange.
10 Mu biro ebyo bangi abalyesittala, baliwaŋŋanayo, balikyawagana.
11 Ne bannabbi bangi ab'obulimba balijja, balikyamya bangi.
12 Era kubanga obujeemu buliyinga obungi, okwagala kw'abasinga obungi kuliwola.
13 Naye agumiikiriza okutuuka ku nkomerero, ye alirokolebwa.